盧修一國會身影新書發表會 台語致詞稿
8/6出席《為前進而戰：盧修一的國會身影》，由於口才不好，寫了講稿，致詞時有添加，也有省略，不全然一樣。這是事先準備的講稿，就放到這裡做個紀念。
～～～～～～～～～～～～～～～～～
陳董事長、在座的來賓，kap（與）線頂的朋友，大家午安。今阿日真榮幸，會當來參加這個盛會，今阿日也（iā）是一个追思懷念的日子。
這本冊《為前進而戰：盧修一的國會身影》，還袂出版之（tsìn）前，我就看過，寫了真好，也（mā）予（hōo）我閣再一遍會當來認捌盧委員，這本冊主要是佇咧寫盧委員最後八冬按怎佇國會為台灣打拼，為改變現狀奮鬥，為打造未來努力。國會問政的書真歹寫，過程遐（hiah）複雜，真乾（ta）真硬，有時陣硬拼硬，無啥物好看頭，也無啥物romantic的代誌好寫，hőng（予人）拍（phah；打）kah（到/得）入院是有的，不過，咱（lán）的作者藍麗娟老師實在真會呵咾tit lih，伊kā（將/把）盧委員佇國會推sak法案的過程寫kah真予人看會入去tit，真無簡單。尾阿，這本冊閣收真濟的相片，會當講是台灣1990年代民主運動真好的教材。
這本冊的重要性，我佇序文內面已經寫真濟，在tsia（遮；這裡）就莫重複來講。今阿日是23冬前，盧委員離開伊上愛的家後kap三个可愛的囝仔的日子，也是離開伊所摯愛的台灣kap台灣人民的時陣。伊對某子的愛，kap伊對島嶼的愛，無法度分割，he（彼；那）是一體的兩面，我定定佇想：這款愛 欲（beh）按怎割捨會落neh？尤其現此時的台灣，咱敢有做kah這23冬來應該做的代誌neh？咱敢有做kah予盧委員會當安息，毋免一直掛慮neh？我想，咱無。
根據我的觀察，戰後台灣的歷史，伊的時間的寸尺──用華語來講，就是「時間尺度」──真大，上基本的，40年做一个單位，半世紀、一甲子，是真普遍。啥物是時間寸尺？就是講，一項代誌會起本質性的變化或是變革，所經歷所需要的時間的長度。台灣一个萬年國會，就45年，學校無教台灣史，國中階段是52年，高中是61年；一个制憲，由台灣人民自救宣言到tsit-má（這馬；現在），已經57年，閣3冬就一甲子阿，猶閣（iáu-koh；還是）看袂到磅空hit（彼）頭的光。咱遠的–莫講，最近大家上關心的「中華台北/Chinese Taipei」的問題，閣3年就40冬，敢會改lih？最近有民間團體做監看報告，除了民視一貫攏是用「台灣隊」稱呼咱的代表隊，開始的時差不多所有的台攏是用「中華隊」，你講台灣是毋是真予人精神錯亂neh？可能因為監看報告的關係，8月初4加（ke）華視、三立兩台用「台灣隊」。這款改變，講起來也真被動，照咱頭拄阿講的，Olimpic欲（beh）正名，干單咱內部，敢猶閣是半世紀、一甲子才有可能會當改變neh？
我會記tit這本冊頭起先的名稱是「新國家的建築師」，這也是1989年盧修一先生競選台北縣立法委員的訴求。建立新國家，是盧委員的初衷（thiong*，不是tiong），也（iā）是伊一生的志業，伊也（mā）為著島嶼的這个夢付出坐監的代價。今阿日，咱做伙佇遮來追思盧委員，我們就愛盡咱的氣（khuì）力，完成盧委員kap濟濟的前輩犧牲奮鬥的目標，咱一定愛縮小時間的寸尺，袂當以40年來起跳，閣較（更加）袂當50年、60年款款阿等，咱猶（iáu）有外濟年會等tit lih neh?
盧委員是我非常欽佩的前輩，伊對台灣的愛，永遠是咱「為前進而戰」的勇氣的來源。向望咱會當做伙完成伊的願望，he（彼）也是咱的本願。
*衷/thiong，許秀年女士不會講錯的，但年輕歌仔戲演員可會講錯的喔，請有志於講好台語的年輕人要格外注意，不要讀成「中/忠」。
